مواجهة

"هاتفضلي طول عمرك غبيه.فوقي بقى واخرجي من خيال المدينه الفاضله اللي مُصره تعيشي فيه لوحدك وللاسف مُصره تعيشي كل الناس اللي حواليكي فيها فخيالك..حاولي ترحمي نفسك وتريحي الناس اللي حواليكي من حساباتك المكعبله والتحليلات والتفاصيل اللي مابتهمش حد غيرك وماحدش بيوقف حياته عليها ...حاولي تفهمي انك انتي اللي تاعبه نفسك بالحاجات اللي ماحدش بيقدر يشوفها غيرك وبرضوا مصممه تقنعيهم بيها .حتى لو هي فعلا حقيقيه الحقيقه دي اصلا مالهاش قيمه غير عندك انتي بس.اكيد العيب مش في كل الناس دي اكيد العيب فيكي انتي...اعملي مره حاجه عكس اللي انتي مقتنعه بيه جربي جايز تنجح...هاتخسري ؟؟؟طب ماكل قناعاتك ماستفدتيش منها حاجه غير فشل خسرتي كل حاجه حبتيها لان اي حاجه حبتيها ماحولتيش حتى تتنازلي عشان تحافظي عليها فضلتي تحاصريها باللي ينفع واللي ماينفعش ماحدش خسر غيرك ولا حدش تعب برضوا غيرك... طب سؤال اسأليه لنفسك ,انتي بعد كل ده سعيده ؟؟؟عاجبك حالك كده ؟!ماعرفتيش تخلقي لنفسك حتى الراحه ....حياتك خوف وتأنيب ضمير وندم ووجع وصوت مش مفهوم دايما ...استفدتي ايه غير انك عملتي لنفسك اسوار في مدينتك الخياليه وحبستي نفسك فيها لوحدك.ده حتى لو غلطتي مابتعرفيش تستمتعي ولو لجزء لحظي بغلطتك دي ...انتي عايشه في كدبه كبيره ضاحكه بيها على نفسك ... بس الحقيقه بقى انك رقصتي على السلم لا طلتي سما ولا ارض ...بطلي مكابره وعيشي بقى زي ما كل اللي حواليكي عايشين مافيش حد بيعمل كل حاجه مظبوطه ومتقاسه بالمقاس زي ماانتي عايزه ماحدش بيدقق زيك كده عيشي زي الناس الطبيعيه ..انتي لا عارفه تغلطي ولا مستحمله تكملي الصح في زمن كله اصلا غلط.لازم تفهمي ان الحياه مش انتي بس.......لازم..."(هكذا قال لها وبرغم انهمار دموعها ظلت تسيطر عليها ابتسامة كبرياء هزيل لم يعد يقوى سوا على الابتسام الحزين)1