فضفضه صريحه جدآآ قلبت برغي....على رأي علي سلامه (دماغي محتاجه الصراحه وقلبي محتاج الحنان)

مش فاهمه ليه مجموعه من الاحاسيس تهاجمني فجأه...
مانكرش ان اي شئ كنت ابقى عايزاه بيجيلي بس للاسف التوقيت دايما مابيكونش في محله ودايما ف الوقت الغلط...كل شئ اتمنيته اتحققلي بس مش فوقته للاسف بعد فوات الاوان

====
مش مقتنعه انا ....اني مجرد شئ متكرر في حياتك او فحياة اي حد
ومش قادره اقتنع ان ممكن شخص يكرر احساس مع كذا شخص بنفس الاخلاص الانهائي من المشاعر
المشاعر اللي بتبقى طايره من عينيك زي السهام ترشق في قلبي
====
مش راسيه انا.....بقالي فتره باخد قرارات وفجأه الظروف كلها تقاوحني ف اضطر اغيرها او ارجع كالعاده فيها
بقالي فتره مستسلمه لاي موجه جايه فوشي...هل ده لان الموج اليومين دول جاي على هوايا!!؟..ولا عشان مابقاش فيا حيل اعافر ف بسلم بكل انسياب نفسي للموج؟ولا عشان عندي امل تاخدني موجه منهم فحته بعيده و جديده ماشوفتهاش ولا عشتهاش؟؟؟؟
=====
شئ ممل جدآ...لما تحس انك مهما حاولت ولفيت وعافرت وقاوحت وبذلت مجهود بياخد من قلبك نبض يكفي يعيشك ضعف عمرك ,,,ياخد انفاس ورا بعضها مخليه ريئتينك وصلوا لحالة هذيان وجنون طلوع ونزول مش ملاحقه
وبعد كتير وكتير من الجري تكتشف انك قاطع مشاوير جوه متاهة علي بابا...تكتشف ان يافندم نقطة البدايه هي نقطة النهايه...طب امال الواحد ليه جري كل الجري ده علشان يقع ويتعور ف النص بس؟؟؟؟
=====
كل اللي نابني بس اني اكتشفت بعد كل جرح وكل بُعد من حد شكل
اني بكبر الف سنه بكبر بقد غربتي جوه الاماكن الواسعه اللي بيسبوها مهجوره فقلبي ولي وهبت مساحتها بقد غلاوتهم
واكتشفت اني بقوى لاء وبنشف... مش لطيف ابدآ احس اني واحده جامده حقيقي دي مش انا...
الله يجازي من كان السبب في اخد حته من مشاعري وقتلها جوه مني
الله يجازي اللي كان السبب فقتل قلب كان بينبض علشان يعيش اللي قتل

====
معقول ياربي مافيش شخص واحد بس حقيقي فحياتي من اللي عشتهم!!!! ماعقول كل الحب ده يطلع لناس من نسج خيالي الجامح
قصص ..حواديت ..مواقف..صور.... ماعقول ولا شخص طلع شبه الصوره
معقول بعاني من احلام اليقظه؟؟؟
====
احساس بيتعبني لما بيتكتب عليا احط نقط تنهي حاجات كتير عمرها فيوم مابتنتهي جوه مني...الف اسم ماعرفهمش او جايز اعرفهم وبرغم العشره باكتشف اني ماعرفتهمش
والف شخص رافض يصدقك شئ عجيب لما تحس انك سهل جدآ واللي قدامك اغبى من انه يحل شئ محلول...من باب الذكاوه والاستنصاح قاعد يفكر فحل ليك ويعاملك على انك لغز من الغاز الدنيا ..

شئ صعب جدا انك تحس بأن في الف شئ جواك اتحبس من باب الكسل او جايز من فعل الهبل فلحظة حق ليك بتضيعه انت بأستسلام بشع للسكوت
مافيش امل في موجهة الف سؤال متوجه لالف اسم عايشين جوه منك رافضين يموتوا من زن الاسئله اللي ادتها براح لحياه جواك علشان رفضت فوقتها تواجه وتحلها
====
ماعرفش مالي ...عامله زي العيل الصغير اللي محتار وحاسس ان كل حاجه اكبر منه
مرعوب وتايهه فوسط وشوش مش مألوفه بالنسباله
معاني اكبر منه ,,,حسابات مابيفهمهاش عقله لسه
لا والانيل انه طفل غبي مابيتعلمش ومابيستوعبش بسهوله اي درس بياخده عملي
===
وانا صغيره اوي لما كنت بتفرج على الافلام العربي وييجي مثلآ استيفان روستي ولا اسماعيل ياسين ولا اي بطل ينّيم حد تنويم مغناطيسي اتجنن
ابقى نفسي موت اتعلم ازاي انّيم كل اللي حواليا تنويم مغناطيسي بس مش عشان اسألهم مخبيين الكنز فين ولا مفتاح الخزنه
لاء خالص ماكنش عندي اي ميول ماديه ... انا بس كان السؤال اللي بيبقى هيموتني هما فعلا بيحبوني بجد ولا لاء
كان هو المفتاح السحري للصراحه اللي دايمآ كنت بدور عليها فكل سؤال ماهما كان ساذج بس احيانآ برغم السؤال السهل والساذج ده الناس بتستكتر ترد بصراحه عليك ماعرفش ليه
دلوقتي كبرت وبردوا عندي نفس الامنيه اني نفسي اتعلم التنويم المغناطيسي
علشان اموت الاسئله اللي بتدور فبالي من ناحيتك
اضمن بجد انك هاتكون صريح لما اسألك ,,,انا كنت ايه بالنسبه ليك؟انا كنت ايه فحياتك؟وطلاما ماكنتش حب ايه كان يمنعك من انك تواجهني؟دلوقتي نفسي اسألك كان فين ضميرك
وليه مُصـر انك بتحبني
كتير بتخيل ان معاني الحب مختلفه من شخص للتاني

ازاي عايزني اصدق انك بتحبني من اي جهه؟عملت ايه عشان الحب اللي بتقول عليه ده؟؟؟
لو واثقه انك هترد بصراحه كان نفسي اعرف ايه غلطاتي بس عشان اتعلم؟؟؟
ايه اصرارك على عدم الصراحه ده؟ ايه اصرارك انك ماتريحنيش مره من الاسئله خايف تخسر ايه

ماعدش فيه قلب عشان تكسره ولا عدش فاضل بنا شئ عشان نخسروا

بأختصار شديد الشخص اللي يقدر يعيش من غيري عادي يبقى عمره فيوم ماحبني.....

ارجوكوا بقى انا عايزه اتعلم التنويم المغناطيسي
=======


احيانا السكوت بيكون افضل من توجيه العتاب لشخصيات كل مابتخيل اني باعتبهم بحس اني فمشهد كوميدي جدآ وتجيلي هسترية ضحك متواصله فبلتزم الصمت
==============
انا بدأت احس اني مليون حد فبعضه
بس كلهم فيهم عامل واحد مشترك هو
(انا)
=====
مش عيب انك تضحي ومش ضعف انك تتنازل الفكره انك بس تركز انت بتضحي وبتتنازل عشان مين؟
==========
ماقدرش انكر منتهى السعاده اللي ببقى فيها اما حد بيفتكرني من غير مناسبه فجأه يقولي وحشتيني
الكلمه دي بجد بتجنني...جايز لانها بتأكدلي فكرة اني لما بمر فحياة حد بحفر اسمي فيها جايز لانها بتأكدلي اني برغم بردوا غبائي مع البشر وانسحابي المفاجئ بدون مقدمات وقراراتي اللي بتصدمني قبلهم مش سهل ابدآ اتنسي!!!!
=============
هي دي مشكلة الناس اللي بيحسوا الحاجه قبل مايتعاملوا معاها...بيفضلوا طول عمرهم مش فاهمين بس حاسين ... وبتفضل نظرات الاستغراب بتحاوطهم من كل الناس اللي بيفهموا من غير مايحسوا
========
مش سهل ابدآ اسلم لألف ايد مَده ايديها بالفراق
مش سهل ابدآ فوقت واحد اشوفني واقفه فوسط صحرا طلعوا كل اللي فيها تماثيل خشب
====
دوشة الافكار بتولد الانفجااار ...وانا بقى زحمتي ودوشتي جوه مني
عايشه الف جمله...الف فكره...مليون سؤال وكل سؤال بيولد مليون اجابه تحيرك بين الف طريق عكس بعضه
============
شكلي ظلمت انا حد زماان وماخدتش بالي
***(دي غنوة لعمرو مصطفي الملحن)