شــــــــتا

البرد اللي بيفكرك دايمآ بالدفا المفقود والهوا اللي بيخبطك جامد فابتسيب عينيك تستقبله بسيل م الدموع هدوء بليل بيرن فيه صوت ذكريات ...هايفكرك قد ايه كنت بتقدر جدآ برغم كل الوجع تضحك فيها من قلبك _ اصوات لناس ردمت عليها من زمن ومصره تجيلك على هيئة اشباح ....وناس تانيه بتحاول تستحضر ارواحها جايز يفتكروك صدفه فنفس اللحظه فيبتسموا طب فاكر!! فاكر لما كنت قوي؟ فاكر كام مره اتحديت وكسبت؟ طب فاكر لما وقعت كتير وعافرت وقومت اقوى وكملت؟ فاكر صوت ضحكك في الاخر على حد فيوم ظلمك؟ طب فاكر نظره مش فارقه معايا الدنيا بنكله وهاضحك ؟ فاكر كنت بتقدر بأتفه حاجه تسعد روحك من غير مجهود ؟ طب فاكر الونس؟ شتا وليل وبرد ودموع واحداث هاتمر قدامك وحنين هايهدك... ودي وشك الناحيه التانيه على قد ماتقدر مانتش قد الحقيقه في الشتا الشتا هادي فاهتسمع فيه بوضوح صدى صوتك عالي جدآ وانت بتتكلم مع نفسك جاي يثبتلك من ابعد زاويه في سقف الاوضه قد ايه انت اتغيرت وقد ايه انت لسه وحيد