بقالي فتره نفسي امسك اول خيط للكلام علشان اشده
بقالي فتره كل حاجه جوايا هربانه مني....وكأنها رافضه تواجهني.....ضيق عجيب لما تحس ان جواك كلام كتير عن حاجات اكتر وكل ده رافض يخرج....كنت اسهل شئ اعمله اني امسك الورقه والقلم اكتب كل حاجه انا عايزه اقولها.....لكن دلوقتي للاسف بفشل كتير في مواجهة قلمي بالورقه....
عندي ملل رهيب من كل الكلام....حاسه ان كل حاجه اتقالت وكأن مافيش جديد.....هانتكلم عن ايه؟؟؟؟؟قصة حب بدأت لكن مانتهتش برغم نزول تتر النهايه مليون الف مره ؟؟؟؟ولا عن قصه حب انتهت من قبل ما تبتدي؟؟؟ ولا هانتكلم عن اصحاب فشنك مع الايام بتتأكد انهم ماكانوش زي ماانت دايما كنت عايز تشوفهم؟؟؟؟طب ماانت اللي دايما كل ما تحب حد تفضل تدافع عنه باستماته وتبررله وتسامحه لحد مابتفوق فلحظه على شئ في حقك لا يغتفر...دلوقتي بس امنت انهم ماينفعوش يكونوا صحاب؟؟؟
دلوقتي بس شوفت الحقيقه غصب عنك؟؟؟
هما مش مسئولين عن انك شخص عبيط!!!!رافض كل السنين دي تشوفهم صح!!!!
هما حتى ماكانوش بيحاولوا يداروا حقيقتهم عليك؟؟؟عشان كده مستغربينك اوي دلوقتي ومش فاهمين ايه سبب صدمتك؟؟؟!
لحد امتى هاتفضل تجمل كل حد تحبه!!!!؟
هو ده نابع من انك بتخاف تبعد فبترفض تصدق الحقيقه؟؟؟ولا ده غرور زياده فيك فبترفض تعترف بأن وجهة نظرك او اختيارك غلط دايما....افرح بنفسك بقى وانت واقف مش مصدق الفضا اللي حواليك...وكالعاده ماحدش واقف جنبك غيرك
دروس مستفاده:_
بقالي فتره كل الاحداث بتدور في فلك واحد في حياتي وكأن كل المواقف اللي واجهتها مع كذا شخص في كذا ناحيه او جانب فحياتي كلهم بيحملوا رسايل واحده
وبعزفوا على نفس الاوتار
هي هي نفس الدروس المستفاده في نهاية كل موقف منهم على حد
1-ماتتحمقش لحد ابدآآآآآ مهما كان قريب جدآآآ منك
سيب كل شخص يواجه مشكلته مع نفسه تعاطف طبعا وشارك بالرأي لكن اوعى تتحمق بزياده عشان ماتندمش بعد كده لما تعرف ان حمقتك وحرقت دمك دي مالهاش اي لزمه اصلا طب وعلى ايه حبة الدم دول تخلصهم على انك تتحمق حد لاقي دم .....
2-اللي مايفرقش معاه وداعك اياك تزعل عليه.....واعرف ان على قد الغلاوه بيكون الوداع
3-لما تيجي تعمل حاجه لحد ياتعملها بحب اويييييييي يا ماتعملهاش خالص
4-ان صديق واحد بس او حتى الوحده احسن كتييير من انك تجمع في ناس من حواليك مش حقيقين عشان مش عايز تبقى مع نفسك لاء نفسك هي اللي بقيالك ومش هاينوبك غير انك ترجع للوحده بشويت وجع انت في غنى عنهم اصلآ
5-ماتقسش كل حاجه عليك......وماتقسش ردود افعالك و تصرفاتك على الناس والعكس صحيح.لان.طريقة التعبير عن المشاعر مختلفه من شخص للتاني ومافيش مسطره ثابته بيتقاس عليها رد فعل الناس حتى لو الموقف ثابت وواحد.. .....اعرف ان "النـــــــــــــاس مقاســـــــــــــات"
6- الحزن في اوقات كتييير بيكون سبب للسعاده
7-القصص المنتهيه من الاول ماتحاولش فيها
8-اللي مايشوفكش صح ويبقى مُصر على انه دايمآ يشوفك غلط ويترجمك غلط مايستاهلش يعرفك...واوعى تكره نفسك عشانه لاء اعرف انه عنده خلل فقدرة استيعابه هو ... وارجوك وفر مجهودك لشئ يستاهل
التجربه:_
كل شئ صغير الواحد بيدخله فحياته لاول مره تجربه....
تنتج عنها
تفاعل ....انسجام ....تنافر.....اتحاد
كلها نتايج تستاهل ان الواحد يعرف اسبابها وابعادها ويشتغل عليها
خصائص وسمات شخصيتك الصح والحقيقيه مش هاتعرفها كويس غير من خلال تجربه....وماحدش يتكسف من تجاربه
-----------------
انا مش هاقولك لو سامحتني او لو رجعتلي او لو نفذتلي اللي نفسي فيه تبقى بتحبني
لاء انا هاقولك انك لو استوعبتني زي ماانا كده بالتركيبه اللي هاتحتار فيها دي لو استوعبتني بكل اللي فات واللي جاي يبقى بجد انت بتحبني
________________________________
تليفون جديد.....تليفون مافيهوش ذاكره ممتليئه
تليفون فاضي بمرحله جديده
تليفون مافيهوش ذكريات.....
مافيهوش صور....ولامسجات استقبلتها...ولامسجات بعتها...ولامسجات بعتها وفضلت متعلقه وماتبعتتش........ولاحتى فيه تقارير لرسايل اتسلمت ولا اتفهمتش....
تليفون ماعرفش اسماء ناس كتيره
تليفون ماعاصرش اهمية ناس فحياتي علشان يحتفظ بتواريخ اخر ظهور لرقمهم عليه
تليفون ماحسش رعشت ايديا عليه وانا بشوف اسم حد فيهم ولا سمعش صوتي وهو ملهوف قبل كده
تليفون ماستطعمش فمره المايك بتاعه دموعي مثلا
تليفون مش شاهد ع الماضي بكل تفاصيل حكاياته
تليفون مليان اوبشنز كتييييييييييير بس ناقصه حاجات اكتر عشان اقدر فيوم احس انه"تليفوني"تليفون طول الوقت بصاله باستغراب
__________________________________
مابقتش اعرف احلم بفارس احلام هاياخدني ويطير
الفارس اللي هايخلصني من اي حاجه تعباني وخنقاني....الفارس اللي هاينسيني معنى الوحده.....نزلت واحده واحده من سابع سما وللاسف فضلت انزل بالحقيقه لحد ماوصلت سابع ارض ومابقتش اعرف احلم اصلا....بقيت حاسه ان الحب بقى مشاعر مستهلكه.....
اعتذر لك عزيزي فارس الاحلام لو كنت حقيقي فعلا
ماكانوش نسبوك للحلم يافندم
